Si bëhet tavë kosi Elbasani me mish qingji – Receta origjinale e shefit Naim Bashmili

Ka gatime që i ndjejmë pjesë thelbësore të identitetit tonë, dhe sa herë pyesin mbi kuzhinën Shqiptare nuk ka dyshim, Tava e Kosit është simboli që na përfaqëson. Butësi e papërsëritshme, pothuajse mistike, ku dy shije të veçanta si mishi i shijshëm i qingjit dhe kosit të athët të shtëpisë, bashkohen në një.

Në zemër të Shqipërisë, qyteti i Elbasanit ka vulosur emrin e tij mbi këtë pjatë të kthyer në një emblemë kombëtare. Ndaj nuk është rastësi që shpesh referohet si Tavë Elbasani.  

Mjeshtëri që mbështetet tek detajet 

Tava e Kosit dallohet jo vetëm për shijen, por edhe për teksturën unike. Përpos mishit të qengjit, nuk mund të ishte kaq e veçantë pa përbërësin tjetër, që e bën këtë gatim kaq kremoz dhe të shijshëm. Kosi i bërë në shtëpi.

Sekreti qëndron tek lidhja e kosit me vezët e fshatit dhe miellin, duke krijuar një masë homogjene dhe kompakte. Ndonëse ofron lirshmëri zgjedhjeje, pasi mund të gatuhet me pulë, bibë apo mish viçi, veçantinë dhe shijen e vërtetë e ka me mishin e qingjit të majmur dhe sidomos me qafën e dashit.

Rrëfmitar përmes shijes 

Kjo recetë, një nga dëshmitë më të vjetra të kuzhinës shqiptare, nuk ka mbërritur e paprekur rastësisht deri në ditët tona. Janë mjeshtërit e njohur si Shef Naim Bashmili, që vazhdon ta përcjellë këtë gatim tradicional në ditët tona.

Shef Bashmili nuk e gatuan Tavë Kosit thjesht si një teknikë; ai e trajton atë si një akt kujtese duke ruajtur çdo detaj të kësaj tradite, që nga përzgjedhja e qengjit të majmë deri te kosi i athët i shtëpisë. Një shije e gjallë, e transmetuar me pasion dhe përkushtim brez pas brezi.